والله حرت و احتار دليلي معاكم يا توانسة. انجيكم.. يمين، تجيوا.. يسار، نطلع معاكم...تهبطوا، نهبطلكم...تطلعوا. و ما تلقى ديما كان الكلام المرزي و الزايد و قلّة الاحترام. الغريبة انوا هالعباد هاذوما ، هوما بيدهم يناديوا بالحرية و حرية التعبير و الرأي و الصحافة النزيهة و الديمقراطية، و هوما أكثر عباد ربي دكتاتورية و تخلف
اعلاش ديما نهربوا القدام قبل ما نستعملوا هاك المخ اللي ربي اعطاهولنا؟ اعلاش ديما ساهل عانا باش نتهموا العباد و نجبوا أعراض الناس في بلاصط نكونوا فاعلين و نعطيوا راينا من غير مانقللوا من شأن الناس الأخرى و من آرائها؟ اعلاش ديما نحكيوا بالصعيب و كاينا ابو العلاء المعري و اللا المتنبي و اللا الفلاسفة اليونان؟ تنحية السروال قدام أمريكا و الخضوع و تتبيص الراس و بوسان الساقين من غير مانذكر النعوت الأخرى كيما هزان القفة واللا التخوين و العمالة؟ كلام مهين و كبير برشا مايليقيش بعباد مثقفين وواعين
كل واحد حر في اختياراتوا...كل واحد منا عندوا مصلحتو و عندو أوموروا، علاش أحنا ديما انحبوا ارواحنا كيما الكوبي كونفورم؟ أنا مانحبش انخمم كيفكم يل سيدي؟ آشنوة المشكل؟
علاش ديما نرميو المسؤولية على المسؤولين الكبار حتى في خمجنا ووسخنا وأمورنا و تفاهاتنا و ديما انقولوا "مو هاذا بسبب النظام". مسكين ها النظام قداش ايتحمل. مانيش اندافع عليه، أما آش دخل النظام مثلا في تخلف التوانسة في الكوندويت؟ واحد تونسي هايشة حمار حيوان متخلف عربي حرق الضوء الأحمر واللا ماحترمش قانون الطرقات أضلا، آش دخل النظام؟ آش دخل النظام في المنطق العادم للتوانسة و الكلام الزايد و قلّة التربية و الحشمة و انعدام الاحترام؟
بربي يزّيوا بلا هزّان و نفضان...كل واحد يحاول يصلّح العوج متاعوا
لازمنا نتعلموا زادا احترام الرأي المخالف اللي ينجم يكون عكس رأينا تماما و ماهو في الآخر إلا رأي يمكن عندوا الحجج متاعوا...إذا مثلا أنا انحب أمريكا و انحب السلام مع إسرائيل، مش معناها أنا أقل وطنية أو عروبة من أي واحد آخر، و لكن لكل واحد منا قناعاتوا و أراءوا الشخصية المبنية على تحليلوا للأمور و للأحداث و التاريخ
علاش هل المنطق العادم في تي ان بلوغ واقتللي واحد يكتب حاجة ماتعجبش برشا على خاطرو يرى الأمور بمنظار مغاير و نسمعوه ما يكره و انجبدلوا عرشوا و امو و اختو و العيلة الكل؟ و وقتللي يكتب مقال يذم فيه الناس و يسب و يلعن، انحبوه و اصوتولوا و انسمعوه مانحبوا احنا نسمعوه
خسارة...خسارة كبيرة اللي طبقة مثقفة وواعية و ساعات ترجع للهمجية و قلّة الحياء و التربية و لمظاهر التخلف..مظهر يعطينا حقيقة البعض منا و ناس بكري قالو "كسكسلوا...يرجع لأصلوا"...فكروا في الموضوع
