يـادي قـفـصـة و يـادي النّيلة

قال المصري: يا دي .... و يا دي النيّلة. مالقيتش مرادف ليها بالتونسي. على كل السبب وراء هذا هو مقال نشرو سي عاشور ناجي في مدونتو "خواطر مسلم سابق" و تحت عنوان "حين يدفع اللائكيون التونسيون الجزية". تيتوف، رجّع عليه مقال، و كيما قالولي برشا قبلوا، حتى هو ظاهرلي منهم، قالو "شبيني ملقيتكش تعلق في حكاية قفصة "بربي ما فهمتش. . فهموني. يا خي أحنا الكل مالزومين باش نحكيوا على قفصة و الشيء اللي صار و صاير فيها؟ يا خي كي الواحد ما يكتبش معناها خائن، عميل، مش وطني، *****؟ تي شنوة الحكاية توّا؟ ثبتولي رواحكم؟ إذا إنتوما مؤمنين بالحرية و بحق التعبير و بالديمقراطية و ادافعوا عليها، لازمكم تفهمــــــــــــــــــــــــــــــــوا اللي راكم باش تسمعوا و باش تقراوا الشيء اللي ما تحبوش تسمعوه و ما تحبوش تقراوه. و إذا إنتوما تؤمنوا بالحرية و الديمقراطية فلازمكم تقبلوني و تقبلو خواطر مسلم سابق كيما قبلتو قبلنا تونيزيا غاي

كل واحد يرقد عل الجنب اللي يريحو. كل واحد يكتب عل اليحب. و من الفوق، هاكم كتبتو على قفصة لين الشيء خرج من خشوماتكم. آش تحبو أكثر؟ رانا عباد مش روبوات باش نكونو الكل كيف كيف. الزّح. شيئ ينطّق من الأجناب

.http://exmouslem.blogspot.com/2008/06/blog-post.html