و الله شيء ينطق البكوش..العوج الي في لبنان يخلي الواحد ينطق من جنابو. البارح كنت نتفرج في هاكي اللي يقولولو السيد حسن نصرالله، لا نصره الله، قاعد يخطب و......على العباد . مساكن و الله. السيد قال أحنا ماعادش حاجتنا بـمعادلة 19 + 11، أحنا نقولولو مالا راحة. قال أنا مانيش ماشي في خط الحرب الأهليه، و أحنا نقولولو محسوب، كان حبيت، ماك تعرف اللي البنانيين الكل ضد الحرب الأهلية. السيد زاد قال الي هو عندو ملاحظات على المحكمة الدولية و الي ماهو باش يعطيها كان لحكومة وحدة وطنية. أي ثبتلي روحك عاد يا شاب نصرو..توا دقيقتين لتالي قولتلنا الي انتي ما عادش تفكر في حكومة وحدة وطنية و توا تقوللنا عندي ملاحظات و مانعطيها كان لحكومة وحدة وطنية؟ تي شبيك دايخ يا راجل؟ هذا كانك راجل بالحق؟؟ باهي، و كي عندك انتي و المعارضة ملاحظات على المحكمة، علاش ما اعطيتوش هال الملاحظات للحكومة وقت اللي كنتو فيها؟ علاش استنيتو حتالين خرجتو منها و قررتو ما قررتو؟ عالى شكون تتمنيكو؟ ياخي ماشي في بالكم اللي العباد دغف؟ قالو ماثماش دولة لبنانية على خاطر الدولة ماهياش قادرة باش تحمي ارضها ؟ ياخي انتوما خليتو شكون يدافع باخلافكم؟ كان واحد يحل فمو والا يحاول باش يحل باب الحوار مع أمريكا و إسرائيل باش يسترجع ارضو بلاش دم توا تقولو عليه عميل و خائن..وانتوما ساهل عندكم منطق التخوين عادا. باهي يا سيدي، قلت اللي ثما انتخابات بعد عامين و الي الأغلبية باش تولي أقلية..والله ما كنتش نعرف الي السيد حسن نصرالله عراف و يشوف المستقبل. بربي كي نجي للبنان شوفلي كفي. قال الي الحكومة من 2005 ماعملت شيء..كيفاش تحبها تعمل حاجة و الاتحكم و الاتسير أمور الناس و الدولة و انتي و اجماعتك مرة معتصين و مرة متغششين و مرة تهزو في الطحين و مرة عاملين حرب و مرة مهددين بالسلاح و ضربة ضربتين و انتوما خارجين من الحكومة..هاذا هو..أما نلعب و الا نحرم..تي خلي الناس تخدم و اعطيهم فرصة و يزي بلا......متاعك. تره قولي ميات الملايين من الدولارات الي تجي للحزب و السلاح اللي داخل كل يوم منين جاي؟ تره قول؟ كانك راجل قول..و كانك راجل ترضى بلجنة تحقيق في الحرب؟ تيزيك يا راجل. نزيدك و نفسرلك يا سيد نصر الله و انتي ما عندك حتى علاقة بالنصر، الخطة متاعك انتي و المعارضة ظاهرة و مكشوفة، يا إما حكومة وحدة وطنية عندكم فيها 11 وزير معناها تنجمو تعطلو الحكومة و تنجمو تتستقيلو كيما اعملتو توا و تجبرو الحكومة باش تستقيل و بالتالي يوليو المفاتح في ايديكم و هذا غير معقول و مش معمول بيه في حتى ديمقراطية..يا ولدي كيفاش انا عندي اغلبية و تحبني نعطيك المفاتح؟ تيشكون هالبوهالي اللي يرضى؟ كي انتي ماعندك حتى دخل بالمحكمة الدولية و ماعندك مناش باش تخاف و ما عندك حتى دخل في اغتيال الحريري و اللي بعدو، امالا مناش خايف؟ آش حرق شعيرك؟ خايف على شكون؟ سوريا والا إيران؟ و الا تعرف اشكون قتل الحريري؟ والا زعمة شاركت في العملية؟ ماك عندك سلاح الجيش اللبناني ما يملكوش. تحبو تبدلو قانون الانتخاب..باهي..انذكرك يا سيد حسن نصر الله، و ربي سبحانه و تعالى قال، وذكر و ان نفعت الذكرى، اللي وقت الي رفيق الحريري الله يرحمو و برشا نواب معاه حبو يعملو قانون انتخابي جديد، انتي و جماعة المعارضة اليوم ، انتوما الي ما حبيتوش تبدلو القانون . و الأغلبية اليوم جابها القانون الي هوما ماكانوش يحبوه و اللي انتي و جماعتك حبيتوه، و اليوم انتي جاي ..... علينا و تقول انحب قانون جديد و انتخابات جديدة و الا استفتاء. بالكشي تستخايلنا نرضعو في صوابعنا و مانعرفوش الدستور اللبناني و مانعرفوش اللي المجلس النيابي هو الي يختار رئيس الجمهورية؟؟ اشنوا تحب انتخابات جديدة ثماش ماتوليو أغلبية و الا على الأقل فريق السلطة يفقد الأغلبية باش تجيبولنا رئيس جديد انتوما تحبوه و سوريا اللي خرجت من الباب ترجع من الشباك و هكاكا ما يتحل حتى تحقيق في المصائب اللي عملتها سوريا في لبنان من 30 عام تقعد في السر؟؟؟ كان نسيت يا سيد انا نذكرك اللي انتي سبق و اعلنت الولاء لسوريا و ايران على الملأ. يا سيدي علاش نتهمو في العباد احنا؟ يا سيدي خلينا نستناو التحقيق يكمل علاش من توا نقولو سوريا؟ اما عمركش سمعت بتحقيق في قضية بلاش محكمة موجودة؟ هكا توا؟ ماهو لازم تكون ثما محكمة موجودة و تابع في التحقيق. اما باش تقول اللي المحكمة باش تتعمل و اللي الاحكام حاضرة و جاهزة..ما نتصورش...ويا سيدي شنوة المشكلة؟ ايا قلنا الاحكام حاضرة تيماهو انتي خاطيك..امالا شيهمك؟؟؟ و الله غريبة. احنا عارفين اللي انتي و المعارضة فلستو، بربي لا نخليو البلاد تفلس. اتقي مولاك يا نصر الله و برا اعمل عمرة والا حجة خيرلك و خلي العباد تعيش و ......... على عمارها
